其實所有人都心知肚明開大片係遲早嘅事，只係唔想講出口。今次擲磚頭點火頭，下次就會有燃燒彈；朝天開得一次槍，下次就會對人射。除非特區政府突然良心發現，公開示意高鐵三跑版權條例過唔過都得，高調宣佈銅鑼灣五子擇日回家，兼送2018全面直選，否則香港根本無其他出路。而再樂觀嘅人，相信都唔會發咁嘅美夢。
咁嘅情況下，唔想直接參與其中，可以做嘅就只有想辦法減低衝突對生活嘅影響：
- 我個人認為建制贏最有可能。特別當「管理員」越來越多，戒嚴出現並非不可能。依個情況下大家主要失去嘅係荷包嘅控制權，以千億計嘅中港融合開支陸續有來。香港繼續沈淪，但爛船都有三斤釘，對老一輩來講，係佢地生命嘅剩餘日子其實亦無乜損失，所以佢地應該普遍期望依個局面。
- 第二個可能，係兩方僵持。呢個情況最麻煩，出街好日被搜身，衰日就血光之災。依個情況下大家一係離港而去，一係參考一眾荷理活末世片早作準備。
- 第三個可能，示威者打贏。老實除非中國變天，否則依個情況無可能出現。變天可能雖然極小，但由上年年尾開始可能性的確係大咗。
總之今次係殺到埋身，唔到你唔理。不過樂觀啲睇，處於依種半內亂狀態嘅國家比比皆是，當地人民生活又咪係繼續。埃及、以色列同烏克蘭咁亂，都仲可以去旅遊，咁香港又有乜好怕呢？