《李先知：高官解讀80後不滿聲音》–「有高官抱怨，這一代年輕人在溫室中成長，給父母寵壞了，終日躲在虛擬世界裏打機交友，跟現實社會脫了節，產生許多不切實際的期望。」

咁嘅解讀，難怪年輕人怨聲載道。日做夜做先賺得個幾千銀，一年都儲唔到高官一個月糧。結婚要錢，買樓又要錢，如果依啲都係高官口中「不切實際嘅期望」，唔通打算成世做奴隸先叫實際？

「有高官私下慨嘆，其實近年中國內地發展迅速，提供了大量機會，可惜香港土生土長的年輕一代不願北上，部分更看不起的經濟發展」

成日叫年輕人北上。大佬，北上咁好不如你地自己上，空啲位出黎比年輕人呀？論經濟，香港人均生產總值係大陸嘅八倍，比上海都仲要高一倍。論自由，「六」同「四」喺大陸唔可以一齊講，講多兩句唔中聽嘅坐監都有份。叫年輕人返去係社會向下流，但對作為上流嘅高官無影響之餘，仲可以少啲問題解決，當然好計一條。

「面對這樣的形勢發展，曾班子已開始思索對策，例如資助更多進修課程，引導我們的年輕人回歸學習正途，或者提供更多文娛康體活動，讓他們忙於打band、唱K、跳街舞，以確保他們無暇上街抗議。」

即係你地無解決辦法啦！高官唔明年輕人處境都算了，最差勁係諗埋哂啲無聊計，治標唔治本。依家週街都係碩士，港人仲進修得唔夠？依個嘅對策嘅目的一句講哂就係減低勞動人口，減少年輕人失業數字。後者仲衰，不如直接K仔合法化、叫佢地個個啪丸啪到無聲出算啦！

高官，拜託，認真啲諗下得唔得？諗唔到就認無計。問題明明係香港政治同經濟環境下嘅產品，怪乜年輕人唔懂事？